Сурат: sugdnews.com Баҳром Иноятзода раиси собиқи шаҳри Кӯлоб бо шаш моддаи Кодекси ҷиноятӣ айбдор дониста мешавад. Қаблан гуфта мешуд, ки нисбати шаҳрдори собиқ бо иттиҳоми порагирӣ ва сӯистифода аз ваколат парванда боз шудааст ва иттиҳоми дузанагиаш тафтиш мешавад. Моҳи июни соли равон Иноятзода аз ҷониби кормандони Кумитаи давлатии амнияти миллӣ бо иттиҳоми порагирӣ дастгир шуда […]
Баҳром Иноятзода раиси собиқи шаҳри Кӯлоб бо шаш моддаи Кодекси ҷиноятӣ айбдор дониста мешавад.
Қаблан гуфта мешуд, ки нисбати шаҳрдори собиқ бо иттиҳоми порагирӣ ва сӯистифода аз ваколат парванда боз шудааст ва иттиҳоми дузанагиаш тафтиш мешавад.
Моҳи июни соли равон Иноятзода аз ҷониби кормандони Кумитаи давлатии амнияти миллӣ бо иттиҳоми порагирӣ дастгир шуда буд. Айбҳое, ки ҳоло нисбати ӯ эълон шудааст, баъдан ба парвандааш илова кардаанд.
Радиои Озодӣ аз манбааш аз додгоҳи вилояти Хатлон навиштааст, парвандаи Иноятзода бо моддаҳои 314 қисми 2, (сӯистифода аз ваколатҳои мансабӣ), 319 қисми 4 (гирифтани пора дар ҳаҷми бузург), 245 қисми 2 (аз они худ кардани молу мулки ба зимааш гузошташуда), 247 (қаллобӣ), 338 нишонаи 1, қисми 2 (ғайриқонунӣ додани қитъаи замин), 262 (қонунгардониии даромадҳои бо роҳи ҷиноят ба даст омада) айбдор мешавад.
Гуфта мешавад, иттиҳоми дузанагӣ, ки дар аксар ҳолат ҷаримаро пешбинӣ мекунад, аз парвандаи ӯ лағв шудааст. Дар сурати тасдиқ гардидани ин ҳама иттиҳомоти нав Иноятзодаро то 20 сол зиндон таҳдид мекунад.
Мақомоти тафтишотӣ гуфтаанд, таҳқиқ нишон дод, ки ӯ ба наздиконаш бе навбат қитъаи замин барои бунёди манзили зист дода ва низ аз чанд сокини дигар пас аз гирифтани пора ин корро анҷом додааст.
Наздикони Иноятзода айбҳои эълоншуда алайҳи ӯро тӯҳмат ва қасосгирии як гурӯҳи манфиатхоҳ медонанд. Боздошти Иноятзода баъд аз интиқод аз қудои Президенти Тоҷикистон Бег Сабур сурат гирифт.
Баҳром Иноятзода зимни нишасти матбуотиаш Бег Сабур раиси Хадамоти алоқаи Ҷумҳури Тоҷикистонро ба хотири пардохт накрадани қарзҳояш дар назди андоз ва обу барқ ба “Хоҷа Аҳрори Валӣ” ташбеҳ карда буд.