Қарзи “Барқи тоҷик” ба 1,59 млрд сомонӣ расид. Чаро рӯз ба рӯз ин ширкат варшикастатар мешавад?

Дар зарфи 9 моҳи соли 2020  нерӯгоҳи барқи обии “Сангтӯда-1” ба ширкати “Барқи тоҷик” зиёда аз 1 млрд 653 млн кВтсоат нерӯи барқ интиқол додааст, ки 76,60 млн кВтсоат аз ҳаҷми пешбинишуда ва нисбат ба ҳамин давраи соли гузашта 114,64 млн кВтсоат камтар мебошад. Дар ин бора ҶСК “НБО Сангтӯда-1” хабар медиҳад.

Гуфта мешавад, “Камшавии нишондиҳандаи воқеӣ аз нақшавӣ ба коҳиши ҳаҷми хариди нерӯи барқ аз ҷониби ягона харидор – ШСХК “Барқи тоҷик” рабт дорад. Коэффисиенти миёнаи истифодаи иқтидори насбшудаи нерӯгоҳ дар 9 моҳи соли равон 37,8%-ро ташкил додааст”, – омадааст дар хабар.

Ҳамчунин қайд карда шудааст, ки арзиши умумии барқи Сангтӯда-1, ки ба ширкати “Барқи тоҷик” интиқол дода шуд, ба андаке бештар аз 514 млн сомонӣ (бо назардошти ААИ) баробар будааст.

“Сатҳи миёнаи пардохт аз оғози соли 2020 (бо назардошти ҳисоббаробаркуниҳо) на зиёдтар аз ҳадди 44% аз барқи иниқолёфтаро ташкил дода, ба идомаи афзоиши қарз назди нерӯгоҳ боис мегардад. Дар иттилоия гуфта шудааст, ки тӯли 9 моҳи соли ҷорӣ қарзи “Барқи тоҷик” 287,92 млн сомонӣ афзуда, то 30 сентябри соли 2020 ба 1,59 млрд сомонӣ расидааст”.

ҶСК “НБО Сангтӯад-1” ширкати муштараки Тоҷикистону Русия мебошад. Иқтидори насбшудаи “Сангтӯда-1” 670 МВт-ро ташкил медиҳад. Ягона харидори барқи нерӯгоҳи “Сангтӯда-1” ШСХК “Барқи тоҷик” мебошад, ки дар навбати худ интиқол, тақсимот ва фурӯши барқро ба истеъмолгарон дар Тоҷикистон таъмин мекунад. Ба ҳиссаи ин нерӯгоҳ ҳудуди 11% аз ҳаҷми умумии интиқоли барқ ба шабакаҳои барқии кишвар рост меояд.