Пулиси Русия як муҳоҷири тоҷикро бо гумони сӯиқасд ба ҷони ноболиғ меҷӯяд

Бино ба иттилои расонаҳои русӣ пулиси шаҳри Санкт-Петербурги Русия як шаҳрванди Тоҷикистонро ба гумони сӯиқасд ба ҷони ноболиғ дар ҷустуҷӯ қарор додааст.

Ба гуфтаи манобеъ, рӯзи панҷшанбеи 26 майи соли ҷорӣ як зани 19-сола сокини вилояти Ленинград ба пулиси шаҳри Санкт-Петербург муроҷиат карда, гуфтааст, ки шавҳари собиқаш ба як ноболиғ аз рӯи рашк бо корд ҳамла кардааст.

Дар тафсилоти ин хабар омада, ки “ҳодиса субҳи 26 май, тахминан соати 07:45 ҳангоми поён омадан аз ошёнаи 4-уми бинои истиқоматӣ дар кӯчаи Комсомолская, маҳаллаи Красный Бори ноҳияи Тосненский рух додааст.”

Мақомоти маҳаллӣ гуфтаанд, шавҳари собиқи ин зани ҷавон шаҳрванди Тоҷикистон буда, аз рӯи рашк ба шиками як навраси 17-сола дастикам 5 корд задааст. Ҷабрдида бо захмҳои зиёди корд дар ҳолати вазнин ба бемористон интиқол ёфтааст.

Пулис мегӯяд, вобаста ба ин ҳодиса парвандаи ҷиноятӣ оғоз намуда, марди муҳоҷимро дар пайгард қарор додааст.

Далели ҳуҷуми шаҳрванди Тоҷикистон ба ноболиғи 17-сола дақиқ нест, ки дар кадом ҳолат сурат гирифтааст. Ва ҳамчунин муносибати ноболиғи захмишуда бо ҷавонзани 19-сола низ зикр нагардидааст.