Русия ихроҷи муҳоҷиронро бештар мекунад 

Думаи давлатии Русия дар қироатҳои дуюм ва сеюм ду қонунеро қабул кард, ки ба сахттар кардани сиёсати муҳоҷират ва пурзӯр намудани назорат бар будубоши шаҳрвандони хориҷӣ дар кишвар равона шудаанд.

Тибқи яке аз қонунҳои қабулшуда, шаҳрвандони хориҷие, ки барои содир намудани ҳар гуна ҷиноят дар қаламрави Русия ва хориҷ аз он доғи судии бардоштанашуда ё пардохтанашуда доранд, дигар наметавонанд шаҳрвандии Русия, иҷозати иқомати доимӣ ё иҷозати иқомати муваққатӣ дарёфт кунанд. Агар чунин ҳолатҳо ҳатто баъд аз додани ин ҳуҷҷатҳо ошкор шавад, онҳо бекор карда мешаванд.

Ин меъёр ба шаҳрвандони хориҷие, ки дар Русия мақоми паноҳанда ё паноҳгоҳи сиёсӣ ва ё муваққатӣ гирифтаанд, татбиқ намегардад.

Раиси Думаи давлатии Русия Вячеслав Володин дар шарҳи ин қонун изҳор дошта, ки танҳо шаҳрвандони хориҷие, ки қонунҳоро риоя мекунанд бояд ҳуқуқи иқомат ва гирифтани шаҳрвандии Русияро дошта бошанд. Ба гуфтаи ӯ, муҳоҷирон инчунин бояд забони русиро донанд, ба таърих, фарҳанг ва анъанаҳои ин кишвар эҳтиром гузоранд.

Қонуни дуюм бошад, рӯйхати ҳуқуқвайронкуниҳои маъмуриро, ки барои онҳо шаҳрвандони хориҷӣ на танҳо ҷарима, балки ихроҷ аз Русия низ мешаванд, васеъ мекунад. Теъдоди моддаҳои дахлдори Кодекси ҳуқуқвайронкуниҳои маъмурии Русия беш аз ду баробар афзоиш ёфта, аз 22 қонун ба 45 мерасад. Ба гуфтаи Володин, аз ин пас сарпечӣ аз талаботи кормандони пулис ё кормандони хадамоти сарҳадӣ низ метавонад барои ихроҷи муҳоҷир асос гардад.

Дар ҳоле вакилони рус рӯйхати “баҳонаҳо” барои ихроҷи муҳоҷиронро бештар карданд, ки танҳо Вазорати корҳои дохилии Русия дар соли 2025 аз ин кишвар 72 000 муҳоҷирро, ки гӯё қонунгузории Русияро вайрон карда буданд, ихроҷ кардааст.

Ҳамзамон бо қабули ин тағйирот, Ҳизби либералӣ-демократии Русия (ЛДПР) низ ташаббусҳои наверо пешниҳод кардааст. Раҳбари ҳизб Леонид Слутский пешниҳод намуда, ки шаҳрвандони хориҷӣ барои ҳуқуқвайронкуниҳои молиявӣ, аз ҷумла вайронкунии мунтазами қонунгузории андоз, низ аз Русия ихроҷ карда шаванд.

Ба гуфтаи Слутский, нисбат ба қонуншиканиҳои молиявии муҳоҷирон бояд “таҳаммулнопазирии сифрӣ” ҷорӣ гардад. Ӯ ҳамчунин даъват кард, ки назорат бар амалиётҳои молиявӣ пурзӯр ва интизоми андозсупорӣ сахттар карда шавад.

Илова бар ин, ЛДПР бори дигар як қатор пешниҳодҳои худро барои боз ҳам сахттар кардани сиёсати муҳоҷират ба миён гузошт. Аз ҷумла, ҳизб пешниҳод намуда, ки вуруди аъзои оилаи муҳоҷирони меҳнатӣ ба Русия пурра манъ карда шавад, таҳсили фарзандони шаҳрвандони хориҷӣ дар синфҳои 10–11, коллеҷҳо ва донишгоҳҳо пулакӣ гардад ва талабот нисбат ба волидони муҳоҷир низ сахттар шавад. Ба иддаои намояндагони ҳизб, агар волидон натавонанд барои фарзандони худ дар Русия шароити муносиби зиндагиро таъмин кунанд, онҳо бояд дар ватани худ тарбия ёбанд.

Бояд гуфт, солҳои ахир фазои муҳоҷирбадбинӣ дар Русия хеле афзоиш ёфта, дар баробари тафтишу бозҷӯиҳои сахт ва ба таври иҷборӣ фиристодани онҳо ба ҷанги зидди Украина, вакилони рус чандин қонунро қабулу баррасӣ карданд, ки будубош ва корро дар ин кишвар барои муҳоҷирон сахттар кардааст.

Ба назари коршиносон, ин тағйири ҷиддӣ дар сиёсатҳои муҳоҷиратии Русия дар ҳолест, ки иқтисоди Русия то ҳол ба қувваи кории муҳоҷирон, махсусан дар сохтмон, хоҷагии коммуналӣ, кишоварзӣ ва логистика, вобастагии зиёд дорад. Баъзе корфармоёни рус ҳам борҳо нигаронӣ карда буданд, ки сахттар шудани сиёсати муҳоҷиратӣ метавонад ҷалби қувваи кориро мушкилтар кунад.