Иштирокдорони задухӯрди гурӯҳии Маскав ихроҷ ва аз шаҳрвандӣ маҳрум мешаванд

Муҳоҷироне, ки дар задухӯрди гурӯҳӣ дар шаҳри Маскав ширкат карда буданд, хатари ихроҷ ва ё бекор шудани шаҳрвандӣ таҳдидашон мекунад.

Мақомоти пулиси ин кишвар мегӯяд, дар пайи задухӯрди шадиди гурӯҳӣ дар маҳаллаи истиқоматии “Прокшино”-и шаҳри Маскав, ки рӯзи 25-уми октябр миёни гурӯҳҳои муҳоҷирон рух дод, пулис беш аз 80 нафарро барои бозпурсӣ боздошт кардаст. Ба иттилои Вазорати корҳои дохилии Русия, ҳамаи шаҳрвандони хориҷие, ки дар ин муноқиша иштирок доштанд, аз кишвар ихроҷ хоҳанд шуд ва вуруди онҳо ба қаламрави Русия манъ мешавад.

Бино ба гузоришҳои расонаҳои русӣ, дар задухӯрди гурӯҳӣ, ки бо истифода аз калтак, бел ва дигар ашёи сахт сурат гирифтааст, шишаҳои мошинҳо шикаста шудаанд ва фазои ваҳшатнок дар маҳалла ба вуҷуд омадааст. Ҳанӯз сабаби аслии задухӯрди гурӯҳӣ маълум нест ва гуфта нашудааст, ки шаҳрвандони кадом кишварҳо байни ҳамдигар муноқиша кардаанд.

Мақомот мегӯянд, 19 нафар барои амали авбошӣ боздошт шудаанд. Пулис таъкид карда, он муҳоҷироне, ки шаҳрвандии Русия доранд ва дар задухӯрди мазкур иштирок доштанд, эҳтимол аз шаҳрвандии ин кишвар маҳрум карда мешаванд.

Баяд гуфт, ки пас аз ҳамлаи хунин дар толори консертии Маскав дар соли 2024, ки дар он муҳоҷирони тоҷик гумонбар буданд, мавҷи нигаронӣ аз муҳоҷират дар ин кишвар афзуда, назорату маҳдудиятҳо дар ин самт сахттар гардидааст.

Коршиносон ин иқдомҳоро ҳамчун афзоиши фишор болои муҳоҷирон, бахусус муҳоҷироне, ки аз кишварҳои Осиёи Марказӣ дар ин кишвар кору зиндагӣ мекунанд, медонанд.