Ҳалокати ронанда дар роҳи Душанбе-Чаноқ ва шикояти IRS

Дар ин чанд рӯзи ахир, бар асари боришоти барф дар роҳи Душанбе – Чаноқ чанд мошин тасодуф кард ва чанде аз баландии кӯҳ ба чуқурӣ сарозер шуданд. Мардум ширкати (IRS)-ро гунаҳкор медонанд, аммо ширкат аз ронандагон шикоят дорад.

Кумитаи ҳолатҳои фавқулодда ва мудофиаи граждании Тоҷикистон хабар дод, ки рӯзи 10-уми ноябри соли ҷорӣ як мошини тамғаи “MUSSO”, ки аз Душанбе ба Панҷакент мерафт, аз баландӣ ба умқи 300 метр сарозер шуда, дар натиҷа ронанда ба ҳалокат расид.

Инчунин дар ин миён дар шабакаҳои иҷтимоӣ наворе аз лаҳзаи сарозер шудани як мошини боркаш нашр шуд, ки гуфта мешуд, он ба сабаби номусоид будани боду ҳаво ва мушкилоти роҳ ба ин фалокат дучор шуд.

Бархе ронандагоне, ки аз ин роҳ истифода мекунанд, дар шабакаҳои иҷтимоӣ садамаҳо ва роҳбандиҳои роҳи Душанбе – Чаноқро ба бемасъулиятии масъулони ширкати “Инновейтив Роуд Солюшнз ЛТД” (IRS), (ширкате, ки масъулияти нигоҳубини ин роҳро бар уҳда дорад) рабт дода, мегӯянд, ки маҳз бемасъулиятии ин ширкат сабаб шуда, ки роҳ сари вақт аз барфу тарма тоза карда намешавад ва дар натиҷа дар нуқтаҳои тангу хатарноки ин роҳи кӯҳӣ ҳодисаҳои нохуш рух медиҳад.

Аммо субҳи имрӯз, 15-уми ноябр масъулони ширкати (IRS) бо нашри паёме дар Фейсбук иттиҳоми бемасъулиятиро рад карда, баракс, ронандагонро гунаҳкор донист. Ин ширкат бо шикоят аз ронандагон мегӯяд, худи ӯ “масъулиятшинос аст, аммо бетафовутиву худхоҳии баъзе ронандагон то андозае ба фаъолияти он монеа эҷод мекунанд.” Масъулони ширкат иддао доранд, ки сабаби танбашавӣ дар ин роҳ ба роҳи муқобил баромадани баъзе ронандагон ва итоат накардани роҳнамоиҳои масъулони (IRS) ва нозирони БДА мебошад.

Ширкат меафзояд, бо ин ки роҳ пулакӣ аст, маънои онро надорад, ки 24 соат боз бошад. Ва бастани роҳ яке аз тасмимҳои ширкат барои таъмини бехатарӣ дар он гуфта мешавад.

Ронандагоне, ки солҳост тариқи ин роҳ ба Душанбе ва Хуҷанд рафтуомад мекунанд, ҳар сол бо фарорасии фасли сармо аз бемасъулиятӣ ва фаъолияти хуб накардани масъулони ширкати (IRS) шикоят мекунанд.

Ронандагон мегӯянд, бо вуҷуде, ки ширкат аз ҳар мошини маблағҳои зиёд мегирад, вале барои сарозер нашудани мошинҳо, ба хусус мошинҳои боркаш дар гардишҳои танг монеаҳое намесозад, ки ҷону моли ронандагон бехатар бимонад.

Ёдовар мешавем, ки ширкати (IRS) соли 2010 масъулияти ин роҳро бар уҳда гирифта онро пулакӣ кард. Гуфта мешавад, ширкати мазкур ба наздикони Эмомалӣ Раҳмон тааллуқ дошта, соли 2009 дар минтақаи оффшори ҷазираҳои Вирҷинияи Бритониё аз сӯи шаҳрванди Тоҷикистон номнавис шудааст.