Оё то поёни соли 2020 нерӯҳои низомии Амрико аз Афғонистон хориҷ мешаванд?

Президенти ИМА Доналд Трамп гуфт, ки нерӯҳои амрикоии мустақар дар Афғонистон то охири ҳамин сол ба ИМА бармегарданд. Дар ин бора худи Доналд Трамп дар саҳифаи Твиттераш хабар дод.

“Чанд нафари боқимондаи мардон ва занони ҷасури мо, ки дар Афғонистон хидмат мекунанд, бояд то соли нав ба хона баргарданд”, – навиштааст президент Трамп дар ин паёмаш.

Чанд соат пештар аз паёми Доналд Трамп, мушовири амнияти миллии ИМА Роберт О’Брайен изҳор дошт, ки шумораи сарбозони амрикоӣ, ки дар Афғонистон мустақаранд, то аввали соли 2021 то 2500 коҳиш дода мешавад.

Оқои О.Брайен рӯзи чаҳоршанбе гуфт, ки дар ҳоли ҳозир дар Афғонистон камтар аз 5 ҳазор сарбози амрикоӣ ҳузур доранд, дар ҳоле, ки ҳангоми ба қудрат расидани Доналд Трамп дар соли 2017 беш аз 10 ҳазор нерӯҳои низомӣ вуҷуд дошт.

Бозпас гардонидани нерӯҳои низомии амрикоӣ аз кишварҳои ҷангзада, ба мисли Афғонистон ва Ироқ, яке аз ваъдаҳои Трамп дар барномаи пешазинтихоботияш дар соли 2016 дар Амрико буд ва акнун, ки ҷаноби Трамп дубора номзад аст, талош мекунад, ки ин ваъдаро иҷро кунад.

Президент Трамп ба хуруҷи нерӯҳои боқимондаи амрикоӣ аз Афғонистон исрор варзида гуфт, ки тибқи Созишномаи сулҳи ИМА ва Толибон, ҳамаи сарбозони хориҷӣ бояд то моҳи майи соли 2021 Афғонистонро тарк кунанд.