Боздошти як мақоми баланди ВКД бо иттиҳоми қаллобӣ

Як мақомдори баланди Раёсати Вазорати корҳои дохилии Тоҷикистон дар вилояти Хатлон ҳамроҳи як ҳамкораш бо иттиҳоми қаллобӣ боздошт шуданд.

Дар ин бора рӯзи 3-юми марти соли ҷорӣ Агентии давлатии назорати молиявӣ ва мубориза бо коррупсияи Тоҷикистон хабар дод. Бар асоси маълумоти тафтишотии ин ниҳод, Саидзода Ҷ.С., навбатдори калони оперативии шуъбаи назорати таҳлилии РВКД Ҷумҳурии Тоҷикистон дар вилояти Хатлон бо ёрдамчии ҳамин шуъба Раҳмонзода А.У. даст ба ҷинояти қаллобӣ задаанд.

Гуфта мешавад, Саидзода ва Раҳмонзода моҳи июни соли 2025 “бо роҳи фиреб” аз шаҳрванд Ч.Г.А. “бо боҳонаи қатъ кардани парвандаи ҷиноятӣ нисбати писараш Ч.Э.Х., ки дар истеҳсолоти муфаттишони РВКД дар вилояти Хатлон қарор дошт, маблағи 30 000 сомониро талаб намуда, дар якчанд ҳолат ин миқдор маблағро гирифтанд.”

Агентии зидди фасод таъкид карда, ки Саидзода ва Раҳмонзода баъди гирифтани маблағ ваъдаи худро, ки мебоист парвандаи Ч.Э.Х.-ро қатъ кунанд, анҷом надодаанд ва маблағи 30 000 сомониро байни худ тақсим карда, онро ба манфиати худ харҷ намудаанд.

Дар робита ба ин ҳолат, Агентии зидди фасод нисбати Саидзода Ҷ.С. ва Раҳмонзода А.У. бо моддаи 247 қисми 3 банди “а”  КҶ Ҷумҳурии Тоҷикистон парвандаи ҷиноятӣ оғоз кард. Ба иттилои ин ниҳод, аллакай таҳқиқи парвандаи ҷиноятӣ нисбати гумонбарон поён ёфта, онро барои эълони ҳукми ниҳоӣ ба додгоҳ фиристоданд.